chheD manzur hai kya aashiq-e-dil-gir ke sath

chheḌ manzūr hai kyā āshiq-e-dil-gīr ke saath

ḳhat bhī aayā kabhī to ġhair kī tahrīr ke saath

go ki iqrār ġhalat thā magar ik thī taskīn

ab to inkār hai kuchh aur hī taqrīr ke saath

pech qismat kā ho to kyā kare is meñ koī

dil ko vābastagī hai zulf-e-girah-gīr ke saath

vo bhī kahte hue kuchh duur tak aa.e pīchhe

ham jo us bazm se nikle bhī to tauqīr ke saath

ye bhī ik vasl kī sūrat thī magar rashk-e-nasīb

us kī tasvīr kabhī ġhair kī tasvīr ke saath

vāda-e-sub.h pe ab kis ko yaqīñ ho qāsid

aaj to jaan ga.ī nāla-e-shab-gīr ke saath

kaho ranjish kā sabab kuchh nahīñ merī hī suno

uzr to chāhiye karnā mujhe taqsīr ke saath

aap dete haiñ aziyyat hī shikāyat kī evaz

kuchh zabāñ se bhī to farmā.iye tāzīr ke saath

dekhiye mil hī gayā aap se vo shoḳh 'nizām'

kaam jo kuchh kare insān sau tadbīr ke saath

chheD manzur hai kya aashiq-e-dil-gir ke sath

KHat bhi aaya kabhi to ghair ki tahrir ke sath

go ki iqrar ghalat tha magar ek thi taskin

ab to inkar hai kuchh aur hi taqrir ke sath

pech qismat ka ho to kya kare is mein koi

dil ko wabastagi hai zulf-e-girah-gir ke sath

wo bhi kahte hue kuchh dur tak aae pichhe

hum jo us bazm se nikle bhi to tauqir ke sath

ye bhi ek wasl ki surat thi magar rashk-e-nasib

us ki taswir kabhi ghair ki taswir ke sath

wada-e-subh pe ab kis ko yaqin ho qasid

aaj to jaan gai nala-e-shab-gir ke sath

kaho ranjish ka sabab kuchh nahin meri hi suno

uzr to chahiye karna mujhe taqsir ke sath

aap dete hain aziyyat hi shikayat ki ewaz

kuchh zaban se bhi to farmaiye tazir ke sath

dekhiye mil hi gaya aap se wo shoKH 'nizam'

kaam jo kuchh kare insan sau tadbir ke sath