chhin gae KHud se tumhaare ho gae

chhin ga.e ḳhud se tumhāre ho ga.e

tum pe āshiq dil ke maare ho ga.e

kuchh din āvāra phire sayyāra-vār

rah ga.e tum par sitāre ho ga.e

tujh pe qurbāñ ai jamāl-e-ahd-e-soz

jis ke biyāhe bhī kuñvāre ho ga.e

kyā usī ko kahte haiñ rabt-e-dilī

chor dil ke jaañ se pyāre ho ga.e

ham the tere ḳhāksāroñ meñ shumār

hāsidoñ meñ chāñd-tāre ho ga.e

chaar nazreñ chaar bāteñ chaar din

ham tumhāre tum hamāre ho ga.e

ik nazar karne se terā kyā gayā

ahl-e-dil ke vāre-nyāre ho ga.e

kuchh to ḳhud dil pheñk the 'rāhīl' ham

kuchh udhar se bhī ishāre ho ga.e

chhin gae KHud se tumhaare ho gae

tum pe aashiq dil ke mare ho gae

kuchh din aawara phire sayyara-war

rah gae tum par sitare ho gae

tujh pe qurban ai jamal-e-ahd-e-soz

jis ke biyahe bhi kunware ho gae

kya usi ko kahte hain rabt-e-dili

chor dil ke jaan se pyare ho gae

hum the tere KHaksaron mein shumar

hasidon mein chand-tare ho gae

chaar nazren chaar baaten chaar din

hum tumhaare tum hamare ho gae

ek nazar karne se tera kya gaya

ahl-e-dil ke ware-nyare ho gae

kuchh to KHud dil phenk the 'rahil' hum

kuchh udhar se bhi ishaare ho gae