chhoD de mangne ki ada chhoD de

chhoḌ de māñgne kī adā chhoḌ de

apnā haq chhīn le iltijā chhoḌ de

chhoḌ de ab mirā tazkira chhoḌ de

kuchh dinoñ ko mujhe lāpata chhoḌ de

nā-ḳhudāoñ kā ab aasrā chhoḌ de

apnī kashtī ba-nām-e-ḳhudā chhoḌ de

ishq meñ qurb hī ishq kī maut hai

qurbatoñ meñ bhī kuchh fāsla chhoḌ de

ye bhī mumkin nahīñ vo bhī mumkin nahīñ

maiñ vafā chhoḌ duuñ tū jafā chhoḌ de

apnā dāman bachā fikr merī na kar

tū mire ghar ko jaltā huā chhoḌ de

bevafā zindagī kā bharosā hī kyā

ye na jaane kahāñ kis jagah chhoḌe de

koī rah rah ke āvāz de hai mujhe

zindagī ab mirā rāsta chhoḌ de

ai 'azīz' ab kisī ko bharosā nahīñ

jaane kab kaun shosha nayā chhoḌ de

chhoD de mangne ki ada chhoD de

apna haq chhin le iltija chhoD de

chhoD de ab mera tazkira chhoD de

kuchh dinon ko mujhe lapata chhoD de

na-KHudaon ka ab aasra chhoD de

apni kashti ba-nam-e-KHuda chhoD de

ishq mein qurb hi ishq ki maut hai

qurbaton mein bhi kuchh fasla chhoD de

ye bhi mumkin nahin wo bhi mumkin nahin

main wafa chhoD dun tu jafa chhoD de

apna daman bacha fikr meri na kar

tu mere ghar ko jalta hua chhoD de

bewafa zindagi ka bharosa hi kya

ye na jaane kahan kis jagah chhoDe de

koi rah rah ke aawaz de hai mujhe

zindagi ab mera rasta chhoD de

ai 'aziz' ab kisi ko bharosa nahin

jaane kab kaun shosha naya chhoD de