chhoD kar aise gaya hai chhoDne wala mujhe

chhoḌ kar aise gayā hai chhoḌne vaalā mujhe

dosto us ne kahīñ kā bhī nahīñ chhoḌā mujhe

bol-bālā is qadar ḳhāmoshiyoñ kā hai yahāñ

kāTne ko dauḌtā hai merā hī kamra mujhe

haañ vahī tasvīr jo khīñchī thī maiñ ne saath meñ

haañ vahī tasvīr kar jaatī hai ab tanhā mujhe

baat to ye ba.ad kī hai kuchh banūñgā yā nahīñ

kūza-gar tū chaak pe to raqs karvātā mujhe

bas isī ummīd pe hotā gayā barbād maiñ

gar kabhī bikhrā to aa kar tū sambhālegā mujhe

āThvīñ shab bhī mahz kuchh ghanToñ kī mehmān hai

gar manānā hotā to ab tak manā letā mujhe

chhoD kar aise gaya hai chhoDne wala mujhe

dosto us ne kahin ka bhi nahin chhoDa mujhe

bol-baala is qadar KHamoshiyon ka hai yahan

kaTne ko dauDta hai mera hi kamra mujhe

han wahi taswir jo khinchi thi main ne sath mein

han wahi taswir kar jati hai ab tanha mujhe

baat to ye baad ki hai kuchh banunga ya nahin

kuza-gar tu chaak pe to raqs karwata mujhe

bas isi ummid pe hota gaya barbaad main

gar kabhi bikhra to aa kar tu sambhaalega mujhe

aaThwin shab bhi mahz kuchh ghanTon ki mehman hai

gar manana hota to ab tak mana leta mujhe