chhup-chhup ke tu shad us se mulaqat kare hai

chhup-chhup ke tū 'shād' us se mulāqāt kare hai

nādān vo ik ik se tirī baat kare hai

kuchh mere bigaḌne se chale jaate the atvār

achchhā hai jo tū tark-e-ināyāt kare hai

tū mujh se jo kartā hai vo rahtī hai mujhī tak

jo maiñ karūñ ik ik se to vo baat kare hai

ranjish se to nafrat kī ḳhalīj aur baḌhegī

aa pyaar kareñ pyaar karāmāt kare hai

jo abr bhī uThtā hai kisī vādi-e-ġham se

vo kisht-e-masarrat hī pe barsāt kare hai

DhīTā.ī to is daur meñ panpe phale-phūle

ro-ro ke sharāfat basar auqāt kare hai

detā bhī jo hai 'shād' sila koī vafā kā

to is tarah jaise koī ḳhairāt kare hai

chhup-chhup ke tu 'shad' us se mulaqat kare hai

nadan wo ek ek se teri baat kare hai

kuchh mere bigaDne se chale jate the atwar

achchha hai jo tu tark-e-inayat kare hai

tu mujh se jo karta hai wo rahti hai mujhi tak

jo main karun ek ek se to wo baat kare hai

ranjish se to nafrat ki KHalij aur baDhegi

aa pyar karen pyar karamat kare hai

jo abr bhi uThta hai kisi wadi-e-gham se

wo kisht-e-masarrat hi pe barsat kare hai

DhiTai to is daur mein panpe phale-phule

ro-ro ke sharafat basar auqat kare hai

deta bhi jo hai 'shad' sila koi wafa ka

to is tarah jaise koi KHairaat kare hai