chhup nahin saktin kabhi sine mein baaten raaz ki

chhup nahīñ saktīñ kabhī siine meñ bāteñ raaz kī

ik shikārī sī nazar hai mere tīr-andāz kī

aaj kyoñ ahl-e-qafas se kar diyā mujh ko judā

par katarvāne the maiñ ne is liye parvāz kī

yaad rakhnā sham-e-mahfil ye mirā zauq-e-sujūd

aarzī hai umr tere naaz kī andāz kī

nik.hat-e-āvāra qaa.em tujh se hai bazm-e-chaman

terī ḳhāmoshī sadā hai sāz-e-be-āvāz kī

ham samajh kar bhī na samjhe apne chārāgar kī baat

pyaar thā yā mehrbānī thī nigāh-e-nāz kī

bul-havas nazroñ ko piirī meñ hai itnā hī malāl

uḌ na sakne se jo hālat hotī hai ik baaz kī

ik shuā sī dekhtā huuñ bujh rahī sham.a meñ

hai binā anjām meñ bhī ik na.e āġhāz kī

uḌ gayā jaate hī us se husn kā dilkash nikhār

aa.ine meñ bas ga.ī sūrat tire e.ajāz kī

chhup nahin saktin kabhi sine mein baaten raaz ki

ek shikari si nazar hai mere tir-andaz ki

aaj kyon ahl-e-qafas se kar diya mujh ko juda

par katarwane the main ne is liye parwaz ki

yaad rakhna sham-e-mahfil ye mera zauq-e-sujud

aarzi hai umr tere naz ki andaz ki

nikhat-e-awara qaem tujh se hai bazm-e-chaman

teri KHamoshi sada hai saz-e-be-awaz ki

hum samajh kar bhi na samjhe apne chaaragar ki baat

pyar tha ya mehrbani thi nigah-e-naz ki

bul-hawas nazron ko piri mein hai itna hi malal

uD na sakne se jo haalat hoti hai ek baz ki

ek shua si dekhta hun bujh rahi shama mein

hai bina anjam mein bhi ek nae aaghaz ki

uD gaya jate hi us se husn ka dilkash nikhaar

aaine mein bas gai surat tere eajaz ki