chhupa kar zaKHm-e-dil lafzon ke pas-manzar mein rakhte hain

chhupā kar zaḳhm-e-dil lafzoñ ke pas-manzar meñ rakhte haiñ

kahānī ghar kī ġhairat-mand apne ghar meñ rakhte haiñ

ham apne saa.e ko qad se kabhī baḌhne nahīñ dete

ham apne paañv apne zarf kī chādar meñ rakhte haiñ

gavārā gulsitāñ kā qaid-ḳhāna kis tarah kar leñ

vo dīvāne jo āzādī kā saudā sar meñ rakhte haiñ

na us se ḳhūb-tar motī na us jaisā koī hiirā

ham aisā gauhar-e-nāyāb chashm-e-tar meñ rakhte haiñ

musalsal zaḳhm khāte haiñ magar uf tak nahīñ karte

balā kā zarf dīvāne dil-e-muztar meñ rakhte haiñ

musāfir apnī manzil se na bhaTke is liye har dam

charāġh-e-āgahī raushan vo bahr-o-bar meñ rakhte haiñ

abhī sochā nahīñ ahl-e-ḳhirad ne jin ke baare meñ

ham aise tajrabe ash'ār ke paikar meñ rakhte haiñ

hisār-e-jaur-e-gul-chīñ meñ bhī haiñ naġhma-sarā taa.ir

surūr-e-lazzat-e-parvāz ab tak par meñ rakhte haiñ

'azīz' us kī jhalak kirdār se bhī to numāyāñ ho

yaqīñ jo aap zāt-e-dāvar-e-mahshar meñ rakhte haiñ

chhupa kar zaKHm-e-dil lafzon ke pas-manzar mein rakhte hain

kahani ghar ki ghairat-mand apne ghar mein rakhte hain

hum apne sae ko qad se kabhi baDhne nahin dete

hum apne panw apne zarf ki chadar mein rakhte hain

gawara gulsitan ka qaid-KHana kis tarah kar len

wo diwane jo aazadi ka sauda sar mein rakhte hain

na us se KHub-tar moti na us jaisa koi hira

hum aisa gauhar-e-nayab chashm-e-tar mein rakhte hain

musalsal zaKHm khate hain magar uf tak nahin karte

bala ka zarf diwane dil-e-muztar mein rakhte hain

musafir apni manzil se na bhaTke is liye har dam

charagh-e-agahi raushan wo bahr-o-bar mein rakhte hain

abhi socha nahin ahl-e-KHirad ne jin ke bare mein

hum aise tajrabe ash'ar ke paikar mein rakhte hain

hisar-e-jaur-e-gul-chin mein bhi hain naghma-sara tair

surur-e-lazzat-e-parwaz ab tak par mein rakhte hain

'aziz' us ki jhalak kirdar se bhi to numayan ho

yaqin jo aap zat-e-dawar-e-mahshar mein rakhte hain