chhuTta hai hath se daman agar tadbir ka

chhūTtā hai haath se dāman agar tadbīr kā

paañv meñ ehsās hotā hai hameñ zanjīr kā

hausla īmān-e-kāmil zor-e-bāzū chāhiye

mard ko zebā nahīñ detā gila taqdīr kā

tajrabe har roz hote hoñ na.e jis shahr meñ

kyā ta.ajjub hai ki sar kaT jaa.e be-taqsīr kā

ḳhuun jis ne bhī kiyā ho log ye kahte rahe

naqsh thā dil par hamāre aap kī shamshīr kā

yuuñ sunahre ḳhvāb ke pīchhe magan hai har javāñ

ho bahut āsān laanā jaise jū-e-shīr kā

ḳhidmat-e-maḳhlūq ho yā ho adab kā tazkira

maiñ nahīñ qaa.il rahā huuñ ḳhud-ba-ḳhud tash.hīr kā

ġham agar aa.e ḳhushī ke baad to hairat nahīñ

ek ruḳh hotā nahīñ 'shāhid' kisī tasvīr kā

chhuTta hai hath se daman agar tadbir ka

panw mein ehsas hota hai hamein zanjir ka

hausla iman-e-kaamil zor-e-bazu chahiye

mard ko zeba nahin deta gila taqdir ka

tajrabe har roz hote hon nae jis shahr mein

kya tajjub hai ki sar kaT jae be-taqsir ka

KHun jis ne bhi kiya ho log ye kahte rahe

naqsh tha dil par hamare aap ki shamshir ka

yun sunahre KHwab ke pichhe magan hai har jawan

ho bahut aasan lana jaise ju-e-shir ka

KHidmat-e-maKHluq ho ya ho adab ka tazkira

main nahin qail raha hun KHud-ba-KHud tashhir ka

gham agar aae KHushi ke baad to hairat nahin

ek ruKH hota nahin 'shahid' kisi taswir ka