choT kha kar jo muskuraate hain

choT khā kar jo muskurāte haiñ

har balā se najāt paate haiñ

tere bande ḳhudā nahīñ bante

dūsroñ ko ḳhudā banāte haiñ

maut se jo vafā nahīñ karte

zindagī se shikast khāte haiñ

vo harīf-e-nazar kabhī na hue

aa.ine haiñ ki TuuTe jaate haiñ

ham kisī kā gilā nahīñ karte

vaqt kī aabrū baḌhāte haiñ

hādsoñ se farār kyā ma.anī

hādse zindagī banāte haiñ

ham ki apnī taraf na dekh sake

log un se nazar milāte haiñ

vaqt kī raushnī pe naaz na kar

vaqt ke ruḳh badal bhī jaate haiñ

zikr-e-ilm-o-adab na chheḌ 'anjum'

hazrat-e-'fauq' yaad aate haiñ

choT kha kar jo muskuraate hain

har bala se najat pate hain

tere bande KHuda nahin bante

dusron ko KHuda banate hain

maut se jo wafa nahin karte

zindagi se shikast khate hain

wo harif-e-nazar kabhi na hue

aaine hain ki TuTe jate hain

hum kisi ka gila nahin karte

waqt ki aabru baDhate hain

hadson se farar kya mani

hadse zindagi banate hain

hum ki apni taraf na dekh sake

log un se nazar milate hain

waqt ki raushni pe naz na kar

waqt ke ruKH badal bhi jate hain

zikr-e-ilm-o-adab na chheD 'anjum'

hazrat-e-'fauq' yaad aate hain