chubhenge Khaar to raston pe chalna chhoD doge kya

chubheñge ḳhaar to rastoñ pe chalnā chhoḌ doge kyā

kaho manzil ko paane kā irāda chhoḌ doge kyā

mohabbat kī hai to anjām tak pahuñchā bhī do is ko

dil-e-nākām ko yūñhī taḌaptā chhoḌ doge kyā

hameñ bhī jānib-e-manzil usī raste se jaanā hai

hamāre vāste thoḌā sā rastā chhoḌ doge kyā

hazāroñ hādse hote haiñ logoñ roz saḌkoñ par

gharoñ se maut ke Dar se nikalnā chhoḌ doge kyā

agar tum se kahe koī ki sher-o-shā.erī chhoḌo

'ajay' tum 'mīr' aur 'ġhālib' ko paḌhnā chhoḌ doge kyā

chubhenge KHar to raston pe chalna chhoD doge kya

kaho manzil ko pane ka irada chhoD doge kya

mohabbat ki hai to anjam tak pahuncha bhi do is ko

dil-e-nakaam ko yunhi taDapta chhoD doge kya

hamein bhi jaanib-e-manzil usi raste se jaana hai

hamare waste thoDa sa rasta chhoD doge kya

hazaron hadse hote hain logon roz saDkon par

gharon se maut ke Dar se nikalna chhoD doge kya

agar tum se kahe koi ki sher-o-shaeri chhoDo

'ajay' tum 'mir' aur 'ghaalib' ko paDhna chhoD doge kya