chune hain barson dayar-e-fikr-o-nazar se shishe

chune haiñ barsoñ dayār-e-fikr-o-nazar se shīshe

lipaT ga.e haiñ ḳhayāl ke bām-o-dar se shīshe

vo be-ḳhabar hai ki us kī dahlīz tap rahī hai

pighal rahe haiñ tamāzat-e-sang-e-dar se shīshe

kisī kī āñkhoñ meñ ab bhī ehsās-e-tishnagī hai

chhalak rahe haiñ kisī ke aks-e-nazar se shīshe

sunā hai ab us ke paas patthar nahīñ bache haiñ

nikal hī ā.eñge kuchh na kuchh mere ghar se shīshe

ġhazal kā kundan sā ruup fan kī asaas chāhe

chaTaḳh rahe haiñ jarāhat-e-be-hunar se shīshe

lahū-lahū-uñgliyoñ meñ larza nahīñ hai 'naqvī'

laraz rahe haiñ figār hāthoñ ke Dar se shīshe

chune hain barson dayar-e-fikr-o-nazar se shishe

lipaT gae hain KHayal ke baam-o-dar se shishe

wo be-KHabar hai ki us ki dahliz tap rahi hai

pighal rahe hain tamazat-e-sang-e-dar se shishe

kisi ki aankhon mein ab bhi ehsas-e-tishnagi hai

chhalak rahe hain kisi ke aks-e-nazar se shishe

suna hai ab us ke pas patthar nahin bache hain

nikal hi aaenge kuchh na kuchh mere ghar se shishe

ghazal ka kundan sa rup fan ki asas chahe

chaTaKH rahe hain jarahat-e-be-hunar se shishe

lahu-lahu-ungliyon mein larza nahin hai 'naqwi'

laraz rahe hain figar hathon ke Dar se shishe