chup ke sahra mein faqat ek sada kaun hun main

chup ke sahrā meñ faqat ek sadā kaun huuñ maiñ

ai ḳhudā tū hī batā mujh ko zarā kaun huuñ maiñ

Dūbtā huuñ to ubhar jaatā huuñ lamha-bhar maiñ

kis ke hoñToñ pe huuñ maiñ harf-e-duā kaun huuñ maiñ

apnī hī zaat kī tashrīh nahīñ kar saktā

rok letī hai mujhe merī anā kaun huuñ maiñ

vasl ne mere tashaḳhḳhus ko sambhāle rakkhā

hijr-o-vahshat se kabhī pūchh zarā kaun huuñ maiñ

maiñ zamīñ-zād bhulā baiThā huuñ mansab apnā

hai ḳhabar apnī na apnā hai pata kaun huuñ maiñ

us ke jaane se ye mahsūs huā hai 'zākir'

hai mirī ruuh alag jism judā kaun huuñ maiñ

chup ke sahra mein faqat ek sada kaun hun main

ai KHuda tu hi bata mujh ko zara kaun hun main

Dubta hun to ubhar jata hun lamha-bhar main

kis ke honTon pe hun main harf-e-dua kaun hun main

apni hi zat ki tashrih nahin kar sakta

rok leti hai mujhe meri ana kaun hun main

wasl ne mere tashaKHKHus ko sambhaale rakkha

hijr-o-wahshat se kabhi puchh zara kaun hun main

main zamin-zad bhula baiTha hun mansab apna

hai KHabar apni na apna hai pata kaun hun main

us ke jaane se ye mahsus hua hai 'zakir'

hai meri ruh alag jism juda kaun hun main