chup ki taqat se guzara nahin hone wala

chup kī tāqat se guzāra nahīñ hone vaalā

ab sharāfat se guzāra nahīñ hone vaalā

ab ye lāzim hai ki sahrāoñ meñ bhaTkā jaa.e

ghar kī vahshat se guzāra nahīñ hone vaalā

sher kahnā hai to kahne kā salīqa sīkho

is meñ ujlat se guzāra nahīñ hone vaalā

dil meñ fitrat ko bhī thoḌī sī jagah dī jaa.e

ik mohabbat se guzāra nahīñ hone vaalā

ghar chalāne ke liye ḳhuun jalānā hogā

sirf mehnat se guzāra nahīñ hone vaalā

raas aate nahīñ ham ko ye khanakte sikke

apnā daulat se guzāra nahīñ hone vaalā

soch ke aao ye darbār-e-mohabbat hai yahāñ

shān-o-shaukat se guzāra nahīñ hone vaalā

chup ki taqat se guzara nahin hone wala

ab sharafat se guzara nahin hone wala

ab ye lazim hai ki sahraon mein bhaTka jae

ghar ki wahshat se guzara nahin hone wala

sher kahna hai to kahne ka saliqa sikho

is mein ujlat se guzara nahin hone wala

dil mein fitrat ko bhi thoDi si jagah di jae

ek mohabbat se guzara nahin hone wala

ghar chalane ke liye KHun jalana hoga

sirf mehnat se guzara nahin hone wala

ras aate nahin hum ko ye khanakte sikke

apna daulat se guzara nahin hone wala

soch ke aao ye darbar-e-mohabbat hai yahan

shan-o-shaukat se guzara nahin hone wala