chupke chupke dard-o-gham ka silsila rahne diya

chupke chupke dard-o-ġham kā silsila rahne diyā

maiñ ne apnī chāhatoñ ko be-sadā rahne diyā

kyā tamāshā-e-sitam sayyād ne barpā kiyā

Daal kar mujh ko qafas meñ dar khulā rahne diyā

qurbateñ mujh se rahīñ aur dil se rakkhā duur bhī

saath rah kar bhī unhoñ ne fāsla rahne diyā

kārvāñ chaltā rahā lekin girā jo zo.af se

rāste meñ jaise ik patthar paḌā rahne diyā

ab tavaqqo hī nahīñ vo ġhair haiñ to ġhair haiñ

bas yahī kuchh soch kar ham ne gila rahne diyā

faisle un ke rahe aur jiit bhī un kī rahī

mujh ko to har haal meñ be-dast-o-pā rahne diyā

chal rahī hai zindagī ye dauḌ hai vo dauḌ hai

is tarah kuchh pā liyā jo kho gayā rahne diyā

thā parī-paikar ko apne husn par itnā ġhurūr

jān-e-bulbul se bhī us ne fāsla rahne diyā

ab kahāñ DhūñDoge 'barham' chāhateñ aur qurbateñ

tum ne ḳhud hī shahr ko nā-āshnā rahne diyā

chupke chupke dard-o-gham ka silsila rahne diya

main ne apni chahaton ko be-sada rahne diya

kya tamasha-e-sitam sayyaad ne barpa kiya

Dal kar mujh ko qafas mein dar khula rahne diya

qurbaten mujh se rahin aur dil se rakkha dur bhi

sath rah kar bhi unhon ne fasla rahne diya

karwan chalta raha lekin gira jo zoaf se

raste mein jaise ek patthar paDa rahne diya

ab tawaqqo hi nahin wo ghair hain to ghair hain

bas yahi kuchh soch kar hum ne gila rahne diya

faisle un ke rahe aur jit bhi un ki rahi

mujh ko to har haal mein be-dast-o-pa rahne diya

chal rahi hai zindagi ye dauD hai wo dauD hai

is tarah kuchh pa liya jo kho gaya rahne diya

tha pari-paikar ko apne husn par itna ghurur

jaan-e-bulbul se bhi us ne fasla rahne diya

ab kahan DhunDoge 'barham' chahaten aur qurbaten

tum ne KHud hi shahr ko na-ashna rahne diya