chupke se qarib aana phir dur nikal jaana

chupke se qarīb aanā phir duur nikal jaanā

har pal kā muqaddar hai maazī meñ badal jaanā

kar kar ke tirī bāteñ paḌh paḌh ke tirā chehra

har sinf-e-suḳhan sīkhī har rañg-e-ġhazal jaanā

ik farz hai hastī par har pal kī pazīrā.ī

tārīḳh kā sheva hai sadiyoñ ko nigal jaanā

paḌtī haiñ pahāḌoñ par sūraj kī shuā.eñ jab

mushkil kahāñ rahtā hai phir barf pighal jaanā

kirdār adā karnā har shaḳhs ko paḌtā hai

āsāñ nahīñ qaumoñ kī taqdīr badal jaanā

'jāved' zarūrī hai duniyā meñ añdherā bhī

hai maslahat-e-yazdāñ ye shaam kā Dhal jaanā

chupke se qarib aana phir dur nikal jaana

har pal ka muqaddar hai mazi mein badal jaana

kar kar ke teri baaten paDh paDh ke tera chehra

har sinf-e-suKHan sikhi har rang-e-ghazal jaana

ek farz hai hasti par har pal ki pazirai

tariKH ka shewa hai sadiyon ko nigal jaana

paDti hain pahaDon par suraj ki shuaen jab

mushkil kahan rahta hai phir barf pighal jaana

kirdar ada karna har shaKHs ko paDta hai

aasan nahin qaumon ki taqdir badal jaana

'jawed' zaruri hai duniya mein andhera bhi

hai maslahat-e-yazdan ye sham ka Dhal jaana