chura laya hun KHud ko apna saya chhoD aaya hun

churā laayā huuñ ḳhud ko apnā saaya chhoḌ aaya huuñ

maiñ us ke aa.ine meñ apnā chehra chhoḌ aaya huuñ

ab āñkhoñ meñ basā le yā supurd-e-āb kar Daale

maiñ us kī diary meñ ek sapnā chhoḌ aaya huuñ

ab aage dekhnā hai zindagī kyā shakl detī hai

maiñ chalte chaak par ḳhud ko adhūrā chhoḌ aaya huuñ

tū merā haq na de mehnat ke badle bhiik hī de de

maiñ apne ghar meñ sab bachchoñ ko bhūkā chhoḌ aaya huuñ

use Dar hai ki yuuñ merī anā na saath mar jaa.e

maiñ apne āḳhirī dushman ko zinda chhoḌ aaya huuñ

mire bachchoñ ko aapas meñ yahī to bāñTnā hogā

pas-e-parda jo nafrat kā asāsa chhoḌ aaya huuñ

ye laġhzish ho ga.ī kal mai-kade se be-ḳhayālī meñ

kisī kā ġham uThā laayā huuñ apnā chhoḌ aaya huuñ

uThā laatā to baḳhshish kā vasīla ban gayā hotā

maiñ masjid meñ jo 'az.har' ek sajda chhoḌ aaya huuñ

chura laya hun KHud ko apna saya chhoD aaya hun

main us ke aaine mein apna chehra chhoD aaya hun

ab aankhon mein basa le ya supurd-e-ab kar Dale

main us ki diary mein ek sapna chhoD aaya hun

ab aage dekhna hai zindagi kya shakl deti hai

main chalte chaak par KHud ko adhura chhoD aaya hun

tu mera haq na de mehnat ke badle bhik hi de de

main apne ghar mein sab bachchon ko bhuka chhoD aaya hun

use Dar hai ki yun meri ana na sath mar jae

main apne aaKHiri dushman ko zinda chhoD aaya hun

mere bachchon ko aapas mein yahi to banTna hoga

pas-e-parda jo nafrat ka asasa chhoD aaya hun

ye laghzish ho gai kal mai-kade se be-KHayali mein

kisi ka gham uTha laya hun apna chhoD aaya hun

uTha lata to baKHshish ka wasila ban gaya hota

main masjid mein jo 'azhar' ek sajda chhoD aaya hun