dagh-e-dil gham ki tapish se yun sar-e-sham jale

dāġh-e-dil ġham kī tapish se yuuñ sar-e-shām jale

apnī nākāmī pe jaise koī nākām jale

un ke jalvoñ kī chamak hai ki dahakte sho.ale

dekhne vaale ye samjhe ki dar-o-bām jale

jūñhī saaqī ne mirī samt baḌhāyā sāġhar

mai-kade meñ ka.ī rindān-e-tahī-jām jale

yuuñ jalā kartā hai dil meñ tirī furqat kā charāġh

jaise turbat pe koī sham.a sar-e-shām jale

ahl-e-irfāñ ko parastār-e-mohabbat pā kar

ātish-e-rashk-o-hasad meñ ka.ī asnām jale

baat kahne kī nahīñ phir bhī kahe dete haiñ

ham tire ġham se kabhī sub.h kabhī shaam jale

dekh kar 'bāsit'-e-ḳhuddār-tabī.at tujh ko

kyā ta.ajjub hai agar gardish-e-ayyām jale

dagh-e-dil gham ki tapish se yun sar-e-sham jale

apni nakaami pe jaise koi nakaam jale

un ke jalwon ki chamak hai ki dahakte shoale

dekhne wale ye samjhe ki dar-o-baam jale

junhi saqi ne meri samt baDhaya saghar

mai-kade mein kai rindan-e-tahi-jam jale

yun jala karta hai dil mein teri furqat ka charagh

jaise turbat pe koi shama sar-e-sham jale

ahl-e-irfan ko parastar-e-mohabbat pa kar

aatish-e-rashk-o-hasad mein kai asnam jale

baat kahne ki nahin phir bhi kahe dete hain

hum tere gham se kabhi subh kabhi sham jale

dekh kar 'basit'-e-KHuddar-tabiat tujh ko

kya tajjub hai agar gardish-e-ayyam jale