dam-e-KHayal-e-zulf-e-butan se chhuDa liya

dām-e-ḳhayāl-e-zulf-e-butāñ se chhuḌā liyā

kyā baal baal mujh ko ḳhudā ne bachā liyā

ab us ko rahm aa.e ye qismat ke haath hai

ban jaa.e baat haal to ham ne banā liyā

sharmā ke muñh chhupāne kā andāz dekhnā

goyā ki us ne 'aib hamārā chhupā liyā

yā ye ki ham ne tark-e-mohabbat kī Thaan lī

yā ye huā ki aaj kisī ko manā liyā

hotā huuñ ek naale pe meñ qatl haa.e haa.e

āvāz de ke apnī qazā ko bulā liyā

zālim fareb de ke na le dil ġharīb kā

ik roz kaam aa.egā terā diyā liyā

rashk-e-raqīb ho ki ġham-e-dūrī-e-habīb

jo vaqt par nasīb huā ham ne khā liyā

maiñ kyā kahūñ ke jaan rahī kis 'azāb meñ

jab us ne mujh ko apnī barābar biThā liyā

jhūTā sahī zalīl sahī koī kuchh kahe

maiñ ne to aaj un ko gale se lagā liyā

pūchhī hai dost ban ke mire dil kī aarzū

us ne zabān de ke mirā mudda'ā liyā

le koī shaan kī to bas itnā kiyā karo

jis se koī baḌā.ī sunī aazmā liyā

mehmān dost ko jo kiyā dostoñ ke saath

dekhā thā jis ko dīda-varoñ ko dikhā liyā

us kī bhī maut sahl ho sakrāt se bache

jis ne hamārī naz' meñ naam aap kā liyā

baiThe to baat karne na dī bazm-e-ġhair meñ

uTThe to apne saath hī mujh ko uThā liyā

dil kā hī ek naam hai shāyad ḳhayāl bhī

aisā agar nahīñ hai to dil us ne kyā liyā

mā'shūq ko to jalva-numā.ī zarūr hai

dekho 'azīz misr ke so maiñ dikhā liyā

is darja tū ne ḳhasta kiyā ai ġham-e-firāq

ham ko hamārī gor ne hoñToñ se khā liyā

samjhā 'safī' ko aap ne jo kuchh ġhalat hai ye

duniyā kā bad-ma.āsh zamāne kā chāliyā

dam-e-KHayal-e-zulf-e-butan se chhuDa liya

kya baal baal mujh ko KHuda ne bacha liya

ab us ko rahm aae ye qismat ke hath hai

ban jae baat haal to hum ne bana liya

sharma ke munh chhupane ka andaz dekhna

goya ki us ne 'aib hamara chhupa liya

ya ye ki hum ne tark-e-mohabbat ki Than li

ya ye hua ki aaj kisi ko mana liya

hota hun ek nale pe mein qatl hae hae

aawaz de ke apni qaza ko bula liya

zalim fareb de ke na le dil gharib ka

ek roz kaam aaega tera diya liya

rashk-e-raqib ho ki gham-e-duri-e-habib

jo waqt par nasib hua hum ne kha liya

main kya kahun ke jaan rahi kis 'azab mein

jab us ne mujh ko apni barabar biTha liya

jhuTa sahi zalil sahi koi kuchh kahe

main ne to aaj un ko gale se laga liya

puchhi hai dost ban ke mere dil ki aarzu

us ne zaban de ke mera mudda'a liya

le koi shan ki to bas itna kiya karo

jis se koi baDai suni aazma liya

mehman dost ko jo kiya doston ke sath

dekha tha jis ko dida-waron ko dikha liya

us ki bhi maut sahl ho sakraat se bache

jis ne hamari naz' mein nam aap ka liya

baiThe to baat karne na di bazm-e-ghair mein

uTThe to apne sath hi mujh ko uTha liya

dil ka hi ek nam hai shayad KHayal bhi

aisa agar nahin hai to dil us ne kya liya

ma'shuq ko to jalwa-numai zarur hai

dekho 'aziz misr ke so main dikha liya

is darja tu ne KHasta kiya ai gham-e-firaq

hum ko hamari gor ne honTon se kha liya

samjha 'safi' ko aap ne jo kuchh ghalat hai ye

duniya ka bad-maash zamane ka chaaliya