dam-e-ulfat mein phansa dil hae dil afsos dil

dām-e-ulfat meñ phañsā dil haa.e dil afsos dil

ab na hovegā rihā dil haa.e dil afsos dil

vo use kyā kyā kahe aur ye saraktā hī nahīñ

ho gayā yuuñ be-hayā dil haa.e dil afsos dil

milte hī zālim ne mujh ko chhoḌ kar yuuñ yak-ba-yak

ho gayā mujh se judā dil haa.e dil afsos dil

āh-o-nāle kī sadā bhī ab to aane se rahī

mar gayā shāyad mirā dil haa.e dil afsos dil

kis tarah us se banegī hai bahut vo bevafā

aur mirā hai bā-vafā dil haa.e dil afsos dil

maiñ ne kitnā dil ko samjhāyā ki ab bhī ishq se

baaz aa dil baaz aa dil haa.e dil afsos dil

so na maanā dil ne aur saude meñ āḳhir ishq ke

yuuñ divāna ho gayā dil haa.e dil afsos dil

chhoḌ kar mere ta.iiñ aur paas zālim ke rahe

aur sahe jaur-o-jafā dil haa.e dil afsos dil

phir to 'āsif' ġhair se kis baat kī kiije ummīd

jab ki apnā de daġhā dil haa.e dil afsos dil

dam-e-ulfat mein phansa dil hae dil afsos dil

ab na howega riha dil hae dil afsos dil

wo use kya kya kahe aur ye sarakta hi nahin

ho gaya yun be-haya dil hae dil afsos dil

milte hi zalim ne mujh ko chhoD kar yun yak-ba-yak

ho gaya mujh se juda dil hae dil afsos dil

aah-o-nale ki sada bhi ab to aane se rahi

mar gaya shayad mera dil hae dil afsos dil

kis tarah us se banegi hai bahut wo bewafa

aur mera hai ba-wafa dil hae dil afsos dil

main ne kitna dil ko samjhaya ki ab bhi ishq se

baz aa dil baz aa dil hae dil afsos dil

so na mana dil ne aur saude mein aaKHir ishq ke

yun diwana ho gaya dil hae dil afsos dil

chhoD kar mere tain aur pas zalim ke rahe

aur sahe jaur-o-jafa dil hae dil afsos dil

phir to 'asif' ghair se kis baat ki kije ummid

jab ki apna de dagha dil hae dil afsos dil