daman-o-kanar ashk se kab tar na hue aah

dāmān-o-kanār ashk se kab tar na hue aah

do chaar bhī aañsū mire gauhar na hue aah

jaise ki dil un lāla-azāroñ ke haiñ sañgīñ

dil chāhne vāloñ ke bhī patthar na hue aah

kahte haiñ ki niklā hai vo ab sair-e-chaman ko

kyā vaqt hai is vaqt mire par na hue aah

ḳhūbāñ ke to ham fidvī o banda bhī kahā.e

lekin vo hamāre na hue par na hue aah

kyā tafraqa hai jab ki ga.e ham to na thā vo

aur aayā vo ham paas to ham ghar na hue aah

kyā naqs hai us ġhairat-e-ḳhurshīd ke aage

ham la.al to kab hote haiñ aḳhgar na hue aah

dariyā bhī bahe mai ke par ai bāda-parastāñ

ye ḳhushk vo lab haiñ ki kabhī tar na hue aah

dekh us ko 'nazīr' ab mujhe aatā hai yahī rashk

kyuuñ ham bhī usī tarah ke dilbar na hue aah

daman-o-kanar ashk se kab tar na hue aah

do chaar bhi aansu mere gauhar na hue aah

jaise ki dil un lala-azaron ke hain sangin

dil chahne walon ke bhi patthar na hue aah

kahte hain ki nikla hai wo ab sair-e-chaman ko

kya waqt hai is waqt mere par na hue aah

KHuban ke to hum fidwi o banda bhi kahae

lekin wo hamare na hue par na hue aah

kya tafraqa hai jab ki gae hum to na tha wo

aur aaya wo hum pas to hum ghar na hue aah

kya naqs hai us ghairat-e-KHurshid ke aage

hum lal to kab hote hain aKHgar na hue aah

dariya bhi bahe mai ke par ai baada-parastan

ye KHushk wo lab hain ki kabhi tar na hue aah

dekh us ko 'nazir' ab mujhe aata hai yahi rashk

kyun hum bhi usi tarah ke dilbar na hue aah