daman daraaz kar to rahe ho duaon ke

dāman darāz kar to rahe ho duāoñ ke

dhabbe bhī haiñ nigāh meñ apnī qabāoñ ke

siine meñ soz-e-marg-e-tamannā na pūchhiye

marghaT meñ jaise uThte hoñ sho.ale chitāoñ ke

ham ne to kashtiyoñ ko Dubonā kiyā qubūl

mannat-guzār ho na sake nā-ḳhudāoñ ke

duniyā ne un pe chalne kī rāheñ banā.ī haiñ

aa.e nazar jahāñ bhī nishāñ mere paañv ke

sahrā ke ḳhushk siine se chashma ubal paḌā

ragḌe lage jo nanhe se bachche ke paañv ke

būḌhā sā ek peḌ vo ab sahn meñ nahīñ

ham ne uThā.e faiz sadā jis kī chhāñv ke

pī lo 'amīr' ab mai-e-irfān-o-āgahī

kyuuñ jaal meñ phañse ho majāzī ḳhudāoñ ke

daman daraaz kar to rahe ho duaon ke

dhabbe bhi hain nigah mein apni qabaon ke

sine mein soz-e-marg-e-tamanna na puchhiye

marghaT mein jaise uThte hon shoale chitaon ke

hum ne to kashtiyon ko Dubona kiya qubul

mannat-guzar ho na sake na-KHudaon ke

duniya ne un pe chalne ki rahen banai hain

aae nazar jahan bhi nishan mere panw ke

sahra ke KHushk sine se chashma ubal paDa

ragDe lage jo nanhe se bachche ke panw ke

buDha sa ek peD wo ab sahn mein nahin

hum ne uThae faiz sada jis ki chhanw ke

pi lo 'amir' ab mai-e-irfan-o-agahi

kyun jal mein phanse ho majazi KHudaon ke