daman-e-dil ke rafu ka jab hunar bhi aaega

dāman-e-dil ke rafū kā jab hunar bhī aa.egā

ziist kī mushkil Dagar se tū guzar bhī aa.egā

ibn-e-ādam mat samajh āsān jannat kā safar

dekhnā raste meñ mamnū'a shajar bhī aa.egā

tū muqaddar ke likhe par dil se raazī hogā jab

tab tabassum tere hoñToñ par nazar bhī aa.egā

bhuul kar sab kuchh chale ho des se pardes ko

rafta-rafta yaad apnā pyārā ghar bhī aa.egā

apnoñ kī yādeñ liye niklegā har din āftāb

hijr ke saa.e liye shab meñ qamar bhī aa.egā

baiThe baiThe apne ghar ke bām-o-dar chuum aaoge

yaad āñgan meñ lagā būḌhā shajar bhī aa.egā

saath rah kar hī khuleñgī ḳhāmiyāñ aur ḳhūbiyāñ

jo rahā nazroñ se ojhal vo nazar bhī aa.egā

she'roñ meñ shāmil karo ḳhūn-e-jigar bhī kuchh 'sahāb'

tab kahīñ jā kar ġhazal meñ kuchh asar bhī aa.egā

daman-e-dil ke rafu ka jab hunar bhi aaega

zist ki mushkil Dagar se tu guzar bhi aaega

ibn-e-adam mat samajh aasan jannat ka safar

dekhna raste mein mamnu'a shajar bhi aaega

tu muqaddar ke likhe par dil se raazi hoga jab

tab tabassum tere honTon par nazar bhi aaega

bhul kar sab kuchh chale ho des se pardes ko

rafta-rafta yaad apna pyara ghar bhi aaega

apnon ki yaaden liye niklega har din aaftab

hijr ke sae liye shab mein qamar bhi aaega

baiThe baiThe apne ghar ke baam-o-dar chum aaoge

yaad aangan mein laga buDha shajar bhi aaega

sath rah kar hi khulengi KHamiyan aur KHubiyan

jo raha nazron se ojhal wo nazar bhi aaega

she'ron mein shamil karo KHun-e-jigar bhi kuchh 'sahab'

tab kahin ja kar ghazal mein kuchh asar bhi aaega