daman ki panahon se mukar kyon nahin jate

dāman kī panāhoñ se mukar kyoñ nahīñ jaate

aañsū mirī palkoñ pe Thahar kyoñ nahīñ jaate

ham log azal se haiñ asīr-e-shab-e-zulmat

tum chāñd ho to chāñd-nagar kyoñ nahīñ jaate

bachchoñ ke masā.il haiñ mahājan ke taqāze

ye ham hī samajhte haiñ ki ghar kyoñ nahīñ jaate

kyoñ karte ho iqrār bhī inkār kī sūrat

auroñ kī tarah saaf mukar kyoñ nahīñ jaate

maanā ki har ik moḌ pe bātil kī hai dīvār

tum rāh-e-haqīqat se guzar kyoñ nahīñ jaate

chalnā hai agar apne hī pairoñ pe tumheñ 'shān'

tum vaqt ke kāñdhe se utar kyoñ nahīñ jaate

daman ki panahon se mukar kyon nahin jate

aansu meri palkon pe Thahar kyon nahin jate

hum log azal se hain asir-e-shab-e-zulmat

tum chand ho to chand-nagar kyon nahin jate

bachchon ke masail hain mahajan ke taqaze

ye hum hi samajhte hain ki ghar kyon nahin jate

kyon karte ho iqrar bhi inkar ki surat

auron ki tarah saf mukar kyon nahin jate

mana ki har ek moD pe baatil ki hai diwar

tum rah-e-haqiqat se guzar kyon nahin jate

chalna hai agar apne hi pairon pe tumhein 'shan'

tum waqt ke kandhe se utar kyon nahin jate