danista kar ke tark-e-safar ro paDe hain hum

dānista kar ke tark-e-safar ro paḌe haiñ ham

kis ko hamāre ġham kī ḳhabar ro paḌe haiñ ham

samjhe the ahl-e-bazm ki ham muskurā.eñge

ye bhī hai ik fareb-e-nazar ro paḌe haiñ ham

zikr-e-ġham-e-hayāt phir ik baar chhiḌ gayā

mahfil meñ terī bār-e-digar ro paḌe haiñ ham

āñkhoñ ke sāmne vahī manzil hai daar kī

yaad aa.ī terī rāhguzar ro paḌe haiñ ham

fasl-e-bahār aa.ī to ye bhī sitam huā

hañsne lage haiñ zaḳhm-e-jigar ro paḌe haiñ ham

kyā kyā umīdeñ le ke guzārī thī shām-e-ġham

dekhā magar jo rañg-e-sahar ro paḌe haiñ ham

ab 'tāj' mil gayā hai hameñ mansab-e-hayāt

hai intihā ḳhushī kī magar ro paḌe haiñ ham

danista kar ke tark-e-safar ro paDe hain hum

kis ko hamare gham ki KHabar ro paDe hain hum

samjhe the ahl-e-bazm ki hum muskuraenge

ye bhi hai ek fareb-e-nazar ro paDe hain hum

zikr-e-gham-e-hayat phir ek bar chhiD gaya

mahfil mein teri bar-e-digar ro paDe hain hum

aankhon ke samne wahi manzil hai dar ki

yaad aai teri rahguzar ro paDe hain hum

fasl-e-bahaar aai to ye bhi sitam hua

hansne lage hain zaKHm-e-jigar ro paDe hain hum

kya kya umiden le ke guzari thi sham-e-gham

dekha magar jo rang-e-sahar ro paDe hain hum

ab 'taj' mil gaya hai hamein mansab-e-hayat

hai intiha KHushi ki magar ro paDe hain hum