daru-e-hosh-ruba nargis-e-bimar to ho

dārū-e-hosh-rubā nargis-e-bīmār to ho

ab ināñ-gīr-ḳhirad gesū-e-ḳhamdār to ho

husn kā nāz-e-tajallī hai niyāz-āmāda

ishq-e-ādāb-e-tamannā ke sazā-vār to ho

jur.at-e-shauq se pindār-e-karam jhuk ke mile

hausla-mand koī aisā gunahgār to ho

lāla-kārī se rag-e-jāñ ke gulistāñ lahke

har-nafas ek lachaktī huī talvār to ho

dil se vo jalva-gah-e-nāz to kuchh duur nahīñ

sīna-e-shauq meñ ik jazba-e-bedār to ho

nām-e-mahbūb pe be-tāb nazāre hoñge

sajda-e-gāh-e-dil-o-jāñ kūcha-e-dildār to ho

un hasīñ āñkhoñ meñ mai-ḳhāna kī shām-e-rañgīñ

jagmagā.egī magar 'aḳhtar'-e-sarshār to ho

daru-e-hosh-ruba nargis-e-bimar to ho

ab inan-gir-KHirad gesu-e-KHamdar to ho

husn ka naz-e-tajalli hai niyaz-amada

ishq-e-adab-e-tamanna ke saza-war to ho

jurat-e-shauq se pindar-e-karam jhuk ke mile

hausla-mand koi aisa gunahgar to ho

lala-kari se rag-e-jaan ke gulistan lahke

har-nafas ek lachakti hui talwar to ho

dil se wo jalwa-gah-e-naz to kuchh dur nahin

sina-e-shauq mein ek jazba-e-bedar to ho

nam-e-mahbub pe be-tab nazare honge

sajda-e-gah-e-dil-o-jaan kucha-e-dildar to ho

un hasin aankhon mein mai-KHana ki sham-e-rangin

jagmagaegi magar 'aKHtar'-e-sarshaar to ho