dastan-e-hijr kya hai KHun-chakan tere baghair

dāstān-e-hijr kyā hai ḳhūñ-chakāñ tere baġhair

ek pal hai sau baras ai jān-e-jāñ tere baġhair

kyā sunā.ūñ hāl-e-dil ai mahv-e-ḳhvāb-e-izz-o-nāz

ho chukī hai zindagī vaqf-e-fuġhāñ tere baġhair

dīdanī hai husn-e-fitrat par hamāre vāste

ye bahār-e-rūh-parvar hai ḳhizāñ tere baġhair

hai shumār-e-āmad-o-raft-e-nafas kā mashġhala

ban ga.ī hai zindagī ik chīstāñ tere baġhair

tujh se kyā chhūTe ki ham saare jahāñ se chhuT ga.e

ho ga.e haiñ yūsuf-e-be-kārvāñ tere baġhair

ye shab-e-furqat to kaaTe se bhī kaTne ko nahīñ

ruk ga.ī ho jaise ye umr-e-ravāñ tere baġhair

ḳhauf lagtā hai mujhe lillāh tū bhī saath chal

mil rahā hai ḳhaak meñ ik naujavāñ tere baġhair

aa ki duniyā muntazir hai kab se istiqbāl ko

har zabāñ par al-amāñ hai ai amaañ tere baġhair

misl-e-tūtī kal chahaktā thā vo bazm-e-nāz meñ

aaj gum hai 'maz.har'-e-shīrīñ-zabāñ tere baġhair

dastan-e-hijr kya hai KHun-chakan tere baghair

ek pal hai sau baras ai jaan-e-jaan tere baghair

kya sunaun haal-e-dil ai mahw-e-KHwab-e-izz-o-naz

ho chuki hai zindagi waqf-e-fughan tere baghair

didani hai husn-e-fitrat par hamare waste

ye bahaar-e-ruh-parwar hai KHizan tere baghair

hai shumar-e-amad-o-raft-e-nafas ka mashghala

ban gai hai zindagi ek chistan tere baghair

tujh se kya chhuTe ki hum sare jahan se chhuT gae

ho gae hain yusuf-e-be-karwan tere baghair

ye shab-e-furqat to kaTe se bhi kaTne ko nahin

ruk gai ho jaise ye umr-e-rawan tere baghair

KHauf lagta hai mujhe lillah tu bhi sath chal

mil raha hai KHak mein ek naujawan tere baghair

aa ki duniya muntazir hai kab se istiqbaal ko

har zaban par al-aman hai ai aman tere baghair

misl-e-tuti kal chahakta tha wo bazm-e-naz mein

aaj gum hai 'mazhar'-e-shirin-zaban tere baghair