dab gain maujen yakayak josh mein aane ke baad

dab ga.iiñ maujeñ yakāyak josh meñ aane ke ba.ad

miT ga.ī tūfāñ kī hastī mujh se Takrāne ke ba.ad

saḳhtiyāñ mere liye āsāniyāñ bantī ga.iiñ

shahsavār-e-karbalā kī yaad aa jaane ke ba.ad

dekh lī chashm-e-jahāñ ne quvvat-e-mazlūmiyat

Dhahā ga.e ḳhud zālimoñ ke ghar sitam Dhāne ke ba.ad

sa.ī-e-haq meñ mere māthe kā pasīna dekh kar

paanī paanī ho ga.iiñ maujeñ bhī lahrāne ke ba.ad

thī mire aane se pahle har taraf chhā.ī ḳhizāñ

sahn-e-gulshan meñ bahār aa.ī mire aane ke ba.ad

dāstān-e-ġhair meñ koī haqīqat thī agar

gard ho kar uḌ ga.ī kyuuñ mere afsāne ke ba.ad

chhoḌ kar tarz-e-fuġhāñ mahv-e-rajaz-ḳhvānī hue

naġhma-sanjān-e-chaman merī ġhazal gaane ke ba.ad

terā sho.ala phūñk saktā hai use maanā magar

soch le ai sham.a apnā hashr parvāne ke ba.ad

mujh ko aatī hai hañsī nāseh tirī is baat par

tū samajhtā hai ki maiñ samjhūñgā samjhāne ke ba.ad

ḳhaak uḌaa.ī yuuñ bagūloñ ne ki parda paḌ gayā

kaun jaane kyā huā sahrā meñ dīvāne ke ba.ad

āshiyāna jal gayā zulm-o-jafā-o-jaur kā

merī āh-e-ātishīñ ke 'barq' ban jaane ke ba.ad

dab gain maujen yakayak josh mein aane ke baad

miT gai tufan ki hasti mujh se Takrane ke baad

saKHtiyan mere liye aasaniyan banti gain

shahsawar-e-karbala ki yaad aa jaane ke baad

dekh li chashm-e-jahan ne quwwat-e-mazlumiyat

Dhaha gae KHud zalimon ke ghar sitam Dhane ke baad

sai-e-haq mein mere mathe ka pasina dekh kar

pani pani ho gain maujen bhi lahrane ke baad

thi mere aane se pahle har taraf chhai KHizan

sahn-e-gulshan mein bahaar aai mere aane ke baad

dastan-e-ghair mein koi haqiqat thi agar

gard ho kar uD gai kyun mere afsane ke baad

chhoD kar tarz-e-fughan mahw-e-rajaz-KHwani hue

naghma-sanjaan-e-chaman meri ghazal gane ke baad

tera shoala phunk sakta hai use mana magar

soch le ai shama apna hashr parwane ke baad

mujh ko aati hai hansi naseh teri is baat par

tu samajhta hai ki main samjhunga samjhane ke baad

KHak uDai yun bagulon ne ki parda paD gaya

kaun jaane kya hua sahra mein diwane ke baad

aashiyana jal gaya zulm-o-jafa-o-jaur ka

meri aah-e-atishin ke 'barq' ban jaane ke baad