dafn kar dijiye aaKHir ye tamasha kab tak

dafn kar dījiye āḳhir ye tamāsha kab tak

ek hī laash se khelegā zamāna kab tak

bandisheñ vus'at-e-dariyā pe lagāne vaalo

ruḳh na badlegā ye simTā huā dariyā kab tak

jo bhī miltā hai tirā dost hī miltā hai mujhe

maiñ tire shahr meñ phirtā rahūñ tanhā kab tak

qatl karne ke tarīqe vahī qātil bhī vahī

is tasalsul se na ghabrā.egī duniyā kab tak

mo'jiza koī bhī ho dard ke māroñ ke liye

aap kahlā.eñge is tarh masīhā kab tak

naqsh patthar pe banāo to koī baat bane

barf kī sil pe tarāshā huā chehra kab tak

koī taskīn-e-nazar kī bhī to sūrat nikle

sirf āvāz se bahlegī ye duniyā kab tak

ab to ahbāb ye kah kah ke guzar jaate haiñ

ek girtī huī dīvār kā saaya kab tak

vaqt kī parda-darī kā ye taqāzā hai 'mushīr'

ziist ke ruḳh pe rivāyāt kā pardā kab tak

dafn kar dijiye aaKHir ye tamasha kab tak

ek hi lash se khelega zamana kab tak

bandishen wus'at-e-dariya pe lagane walo

ruKH na badlega ye simTa hua dariya kab tak

jo bhi milta hai tera dost hi milta hai mujhe

main tere shahr mein phirta rahun tanha kab tak

qatl karne ke tariqe wahi qatil bhi wahi

is tasalsul se na ghabraegi duniya kab tak

mo'jiza koi bhi ho dard ke maron ke liye

aap kahlaenge is tarh masiha kab tak

naqsh patthar pe banao to koi baat bane

barf ki sil pe tarasha hua chehra kab tak

koi taskin-e-nazar ki bhi to surat nikle

sirf aawaz se bahlegi ye duniya kab tak

ab to ahbab ye kah kah ke guzar jate hain

ek girti hui diwar ka saya kab tak

waqt ki parda-dari ka ye taqaza hai 'mushir'

zist ke ruKH pe riwayat ka parda kab tak