dahan-e-mehman mein kanTe

dahan-e-mehmān meñ kāñTe

pahlū-e-mezbān meñ kāñTe

ḳhuun thūkegā jo bhī khā.egā

aap ke ḳhās-dān meñ kāñTe

ḳhūb-rūoñ kā kyā bharosā hai

aan meñ phuul aan meñ kāñTe

gul-e-ruḳhsār kī hifāzat ko

us ne laTkā.e kaan meñ kāñTe

chubh rahe haiñ mire ḳhayāloñ ko

bāġh-e-jannat-nishāñ meñ kāñTe

muskurātī ḳhamoshiyāñ us kī

mere tarz-e-bayān meñ kāñTe

hasrateñ aur ijz-goyā.ī

dil meñ kāñTe zabān meñ kāñTe

ret meñ rul ke chal ga.e jauhar

jauharī kī dukān meñ kāñTe

rākshas ban ga.e mahā-jogī

gyaan meñ aur dhyān meñ kāñTe

kabhī hotī thī eḌiyoñ meñ ḳhalish

ab to haiñ jism-o-jān meñ kāñTe

kitnā mushkil huā hai rizq-e-halāl

shorbe aur naan meñ kāñTe

chunñe vaalā koī nahīñ 'sayyad'

aur bhare haiñ jahān meñ kāñTe

dahan-e-mehman mein kanTe

pahlu-e-mezban mein kanTe

KHun thukega jo bhi khaega

aap ke KHas-dan mein kanTe

KHub-ruon ka kya bharosa hai

aan mein phul aan mein kanTe

gul-e-ruKHsar ki hifazat ko

us ne laTkae kan mein kanTe

chubh rahe hain mere KHayalon ko

bagh-e-jannat-nishan mein kanTe

muskuraati KHamoshiyan us ki

mere tarz-e-bayan mein kanTe

hasraten aur ijz-goyai

dil mein kanTe zaban mein kanTe

ret mein rul ke chal gae jauhar

jauhari ki dukan mein kanTe

rakshas ban gae maha-jogi

gyan mein aur dhyan mein kanTe

kabhi hoti thi eDiyon mein KHalish

ab to hain jism-o-jaan mein kanTe

kitna mushkil hua hai rizq-e-halal

shorbe aur nan mein kanTe

chunne wala koi nahin 'sayyad'

aur bhare hain jahan mein kanTe