dahshat ki ek chaTan hai dil par dhari hui

dahshat kī ik chaTān hai dil par dharī huī

ā.īna bilbilāyā ki tesha-zanī huī

sapnoñ meñ koī sāya-e-dīvār bhī nahīñ

dhūpoñ ke bistaroñ se hai nīñdeñ uḌī huī

ḳhāmosh vaqt ke yahī tevar rahe ki bas

bād-e-sumūm bād-e-sabā meñ ghulī huī

Tapkī na ik shu’ā’ bhī rauzan se sub.h ke

shab-bhar to tīrgī kī thī naddī chaḌhī huī

yuuñ dhaḌkanoñ se rang-e-tamannā bichhaḌ gayā

jaise shajar se shāḳh-e-samar hai kaTī huī

shāḳh-e-talab se girte hī barg-e-umīd ko

dosh-e-havā pe nisbat-e-āvārgī huī

dahshat ki ek chaTan hai dil par dhari hui

aaina bilbilaya ki tesha-zani hui

sapnon mein koi saya-e-diwar bhi nahin

dhupon ke bistaron se hai ninden uDi hui

KHamosh waqt ke yahi tewar rahe ki bas

baad-e-sumum baad-e-saba mein ghuli hui

Tapki na ek shu’a’ bhi rauzan se subh ke

shab-bhar to tirgi ki thi naddi chaDhi hui

yun dhaDkanon se rang-e-tamanna bichhaD gaya

jaise shajar se shaKH-e-samar hai kaTi hui

shaKH-e-talab se girte hi barg-e-umid ko

dosh-e-hawa pe nisbat-e-awargi hui