dam-e-aKHir sanam phere hain aankhen bad-guman ho kar

dam-e-āḳhir sanam phere haiñ āñkheñ bad-gumāñ ho kar

phire haiñ ye mirī āñkhoñ ke taare putliyāñ ho kar

mirī fariyād sun kar fasl-e-gul meñ shor kartī haiñ

chaman meñ bulbuleñ nālāñ haiñ merī ham-zabāñ ho kar

gale mil kar urūs-e-teġh se ye aabrū paa.ī

paḌe haiñ haar zaḳhmoñ ke gale meñ baddhiyāñ ho kar

shab-e-furqat koī naala agar muñh se nikaltā hai

falak se phir kar aatā hai balā-e-nā-gahāñ ho kar

havā-e-dīd-e-gul josh-e-junūñ meñ bhī rahī baaqī

ga.e 'gustāḳh' sahrā ko to sū-e-bostāñ ho kar

dam-e-aKHir sanam phere hain aankhen bad-guman ho kar

phire hain ye meri aankhon ke tare putliyan ho kar

meri fariyaad sun kar fasl-e-gul mein shor karti hain

chaman mein bulbulen nalan hain meri ham-zaban ho kar

gale mil kar urus-e-tegh se ye aabru pai

paDe hain haar zaKHmon ke gale mein baddhiyan ho kar

shab-e-furqat koi nala agar munh se nikalta hai

falak se phir kar aata hai bala-e-na-gahan ho kar

hawa-e-did-e-gul josh-e-junun mein bhi rahi baqi

gae 'gustaKH' sahra ko to su-e-bostan ho kar