dam-e-raftar-e-jaanan ye sada-e-naz aati hai

dam-e-raftār-e-jānāñ ye sadā-e-nāz aatī hai

sambhāleñ sab diloñ ko paañv kī āvāz aatī hai

sabā jo pur mirā ai bāġhbāñ laatī hai gulshan meñ

qafas se saath yaañ tak hasrat parvāz aatī hai

abhī jaao na yārāñ qafas-e-gulzār kī jānib

zarā ham muntazir haiñ tāqat-e-parvāz aatī hai

asar ye hai ki bulbul jab qafas meñ kartī hai naala

shikast-e-rañg-e-gul kī baaġh se āvāz aatī hai

nazar duzdīda terī kab nazar aatī hai āshiq ko

uḌā jaatā hai dil aur tiir kī āvāz aatī hai

shikva-e-husn ye hai jab kabhī tum jā nikalte ho

to but-ḳhāne se yā-allāh kī āvāz aatī hai

sadā dī maiñ ne jab aane lagī sub.h shab-e-vaslat

samajh kar aa kidhar o tafarqe parvāz aatī hai

tire baa.is se jis ne kal hameñ dī thī bahut iizā

vahī shab aaj phir ai tāla-e-nā-sāz aatī hai

huī muddat tire zulfoñ ke dīvāne kī sehat ko

bigaḌ jaatā hai shab zanjīr kī āvāz aatī hai

zarā kah de koī un se qarīb aayā dam-e-āḳhir

ki ulTī saañs ab to ai mire dam-sāz aatī hai

javānī ke nishāñ andām se hone lage zāhir

mubārak ho bahār ai sard baaġh naaz aatī hai

jhukā.e sar na kyuuñ ḳhāmosh baiThūñ hijr-e-jānāñ meñ

ki dil ke TūTne kī kaan meñ āvāz aatī hai

bhalā aaj zinda āh-e-dil āshiq kare paidā

ki ḳhud vo kah rahe haiñ dard kī āvāz aatī hai

'rashīd' ash.ār mohmal paḌh rahe ho jam.a haiñ shā.ir

ḳhajil hote nahīñ tum dil kī ye āvāz aatī hai

dam-e-raftar-e-jaanan ye sada-e-naz aati hai

sambhaalen sab dilon ko panw ki aawaz aati hai

saba jo pur mera ai baghban lati hai gulshan mein

qafas se sath yan tak hasrat parwaz aati hai

abhi jao na yaran qafas-e-gulzar ki jaanib

zara hum muntazir hain taqat-e-parwaz aati hai

asar ye hai ki bulbul jab qafas mein karti hai nala

shikast-e-rang-e-gul ki bagh se aawaz aati hai

nazar duzdida teri kab nazar aati hai aashiq ko

uDa jata hai dil aur tir ki aawaz aati hai

shikwa-e-husn ye hai jab kabhi tum ja nikalte ho

to but-KHane se ya-allah ki aawaz aati hai

sada di main ne jab aane lagi subh shab-e-waslat

samajh kar aa kidhar o tafarqe parwaz aati hai

tere bais se jis ne kal hamein di thi bahut iza

wahi shab aaj phir ai tala-e-na-saz aati hai

hui muddat tere zulfon ke diwane ki sehat ko

bigaD jata hai shab zanjir ki aawaz aati hai

zara kah de koi un se qarib aaya dam-e-aKHir

ki ulTi sans ab to ai mere dam-saz aati hai

jawani ke nishan andam se hone lage zahir

mubarak ho bahaar ai sard bagh naz aati hai

jhukae sar na kyun KHamosh baiThun hijr-e-jaanan mein

ki dil ke TuTne ki kan mein aawaz aati hai

bhala aaj zinda aah-e-dil aashiq kare paida

ki KHud wo kah rahe hain dard ki aawaz aati hai

'rashid' ashaar mohmal paDh rahe ho jama hain shair

KHajil hote nahin tum dil ki ye aawaz aati hai