dam-e-subh aandhiyon ne jinhen rakh diya masal ke

dam-e-sub.h āñdhiyoñ ne jinheñ rakh diyā masal ke

vahī nanhe nanhe paude the ghane daraḳht kal ke

na.e sāthiyoñ kī dhun meñ tirī dostī ko chhoḌā

koī tujh sā bhī na paayā tire shahr se nikal ke

vahī rasm-e-kam-nigāhī vahī raat kī siyāhī

mire shahr ke charāġho yahāñ kyā karoge jal ke

na.e ḳhvāb merī manzil tah-e-āb merā sāhil

tumheñ kyā milegā yaaro mire saath saath chal ke

sar-e-shām aaj koī mire dil se kah rahā hai

koī chāñd bhī to nikle koī jaam bhī to chhalke

ye jo ghar luTā luTā hai ye jo dil bujhā bujhā hai

isī dil meñ rah ga.e haiñ ka.ī āftāb Dhal ke

ye mushāhida hai merā rah-e-zindagī meñ 'bāsir'

vahī muñh ke bal girā hai jo chalā sañbhal sañbhal ke

dam-e-subh aandhiyon ne jinhen rakh diya masal ke

wahi nanhe nanhe paude the ghane daraKHt kal ke

nae sathiyon ki dhun mein teri dosti ko chhoDa

koi tujh sa bhi na paya tere shahr se nikal ke

wahi rasm-e-kam-nigahi wahi raat ki siyahi

mere shahr ke charagho yahan kya karoge jal ke

nae KHwab meri manzil tah-e-ab mera sahil

tumhein kya milega yaro mere sath sath chal ke

sar-e-sham aaj koi mere dil se kah raha hai

koi chand bhi to nikle koi jam bhi to chhalke

ye jo ghar luTa luTa hai ye jo dil bujha bujha hai

isi dil mein rah gae hain kai aaftab Dhal ke

ye mushahida hai mera rah-e-zindagi mein 'basir'

wahi munh ke bal gira hai jo chala sanbhal sanbhal ke