dar-ba-dar phirta tha jab-tab tujhe aabaad kiya

dar-ba-dar phirtā thā jab-tab tujhe ābād kiyā

kyā bigāḌā thā tirā kyuuñ mujhe barbād kiyā

jis tarah kartā hai tū ḳhūn-e-tamannā merā

kyā kabhī maiñ ne bhī aise tujhe nāshād kiyā

zaḳhm jo tū ne diye the haiñ abhī tak taaza

jab chalī sard havā maiñ ne tujhe yaad kiyā

is se behtar thā ki tū qaid hī rakhtā mujh ko

par katar kar mirā kyuuñ baaġh meñ āzād kiyā

zindagī khel nahīñ hai jise bachchoñ kī tarah

kabhī ābād kiyā aur kabhī barbād kiyā

zeb detā hai tujhe mufsid-e-daurāñ kā ḳhitāb

nāravā thā jo vo kyuuñ ai sitam-ījād kiyā

bāġhbāñ jis ko banāyā thā usī ne 'barqī'

sahn-e-gulshan meñ bapā nāla-o-fariyād kiyā

dar-ba-dar phirta tha jab-tab tujhe aabaad kiya

kya bigaDa tha tera kyun mujhe barbaad kiya

jis tarah karta hai tu KHun-e-tamanna mera

kya kabhi main ne bhi aise tujhe nashad kiya

zaKHm jo tu ne diye the hain abhi tak taza

jab chali sard hawa main ne tujhe yaad kiya

is se behtar tha ki tu qaid hi rakhta mujh ko

par katar kar mera kyun bagh mein aazad kiya

zindagi khel nahin hai jise bachchon ki tarah

kabhi aabaad kiya aur kabhi barbaad kiya

zeb deta hai tujhe mufsid-e-dauran ka KHitab

narawa tha jo wo kyun ai sitam-ijad kiya

baghban jis ko banaya tha usi ne 'barqi'

sahn-e-gulshan mein bapa nala-o-fariyaad kiya