dar-e-imkan se guzar kar sar-e-manzar aa kar

dar-e-imkāñ se guzar kar sar-e-manzar aa kar

ham 'ajab lahr meñ haiñ apne na.e ghar aa kar

jise jaanā hī nahīñ apne kināroñ se judā

use dekhā bhī nahīñ mauj se bāhar aa kar

ātish-e-ġham pe nazar kī hai kuchh aise ki ye aañch

baat kar saktī hai ab mire barābar aa kar

tū ne kis harf ke āhang meñ Dhālā thā mujhe

saañs bhī TuuT rahā hai sar-e-mahzar aa kar

use dekhā thā ḳhat-e-ḳhvāb ke us paar kabhī

ye sitāra jo girā hai mire andar aa kar

ik sadā koh-e-nidā se kisī apne kī sadā

rone lag jaatī hai is dasht meñ aksar aa kar

shāḳh-tā-shāḳh 'ajab 'ālam-e-vahshat hai abhī

tā.ir-e-jāñ kabhī Thahrā thā mire ghar aa kar

dar-e-imkan se guzar kar sar-e-manzar aa kar

hum 'ajab lahr mein hain apne nae ghar aa kar

jise jaana hi nahin apne kinaron se juda

use dekha bhi nahin mauj se bahar aa kar

aatish-e-gham pe nazar ki hai kuchh aise ki ye aanch

baat kar sakti hai ab mere barabar aa kar

tu ne kis harf ke aahang mein Dhaala tha mujhe

sans bhi TuT raha hai sar-e-mahzar aa kar

use dekha tha KHat-e-KHwab ke us par kabhi

ye sitara jo gira hai mere andar aa kar

ek sada koh-e-nida se kisi apne ki sada

rone lag jati hai is dasht mein aksar aa kar

shaKH-ta-shaKH 'ajab 'alam-e-wahshat hai abhi

tair-e-jaan kabhi Thahra tha mere ghar aa kar