dar-e-umid muqaffal nahin hua ab tak

dar-e-umīd muqaffal nahīñ huā ab tak

maiñ tere hijr meñ pāgal nahīñ huā ab tak

tamām umr ḳhushī saath de nahīñ paa.ī

nuzūl-e-ġham bhī musalsal nahīñ huā ab tak

tire baġhair jo ik mas.ala banā huā thā

to mil gayā bhī to vo hal nahīñ huā ab tak

maiñ us ko bhuul chukā huuñ ajiib baat hai ye

jo chehra aañkh se ojhal nahīñ huā ab tak

taġhayyurāt ne dastūr sab badal Daale

usūl-e-ishq mo.attal nahīñ huā ab tak

na jaane kaun musavvir banā rahā hai mujhe

mirā vajūd mukammal nahīñ huā ab tak

ye tere ishq kī tauhīn hai parī-zādī

maiñ terī yaad meñ bekal nahīñ huā ab tak

dar-e-umid muqaffal nahin hua ab tak

main tere hijr mein pagal nahin hua ab tak

tamam umr KHushi sath de nahin pai

nuzul-e-gham bhi musalsal nahin hua ab tak

tere baghair jo ek masala bana hua tha

to mil gaya bhi to wo hal nahin hua ab tak

main us ko bhul chuka hun ajib baat hai ye

jo chehra aankh se ojhal nahin hua ab tak

taghayyuraat ne dastur sab badal Dale

usul-e-ishq moattal nahin hua ab tak

na jaane kaun musawwir bana raha hai mujhe

mera wajud mukammal nahin hua ab tak

ye tere ishq ki tauhin hai pari-zadi

main teri yaad mein bekal nahin hua ab tak