dar khol ke zindan ke har qaid uTha di hai

dar khol ke zindāñ ke har qaid uThā dī hai

lekin mere hoñToñ pe ik muhr lagā dī hai

ai ahl-e-chaman pūchho kyā soch ke maalī ne

kāñToñ ko dulārā hai phūloñ ko sazā dī hai

sahrāoñ se ham guzre kāñToñ ko lahū de kar

har moḌ pe manzil ke ik sham' jalā dī hai

phir shāḳh-e-nasheman se uTThegā dhuāñ barsoñ

gulchīñ ne gulistāñ meñ phir aag lagā dī hai

ai ahl-e-ġharaz tum ne tā'mīr to kī lekin

har dil meñ ta'assub kī dīvār uThā dī hai

tā'bīr mile shāyad ab kal ke muarriḳh ko

ham ne na.e ḳhvāboñ kī tasvīr sajā dī hai

ehsān 'shabānā' hai ye ahl-e-gulistāñ kā

ham jaise divānoñ ko kāñToñ kī qabā dī hai

dar khol ke zindan ke har qaid uTha di hai

lekin mere honTon pe ek muhr laga di hai

ai ahl-e-chaman puchho kya soch ke mali ne

kanTon ko dulara hai phulon ko saza di hai

sahraon se hum guzre kanTon ko lahu de kar

har moD pe manzil ke ek sham' jala di hai

phir shaKH-e-nasheman se uTThega dhuan barson

gulchin ne gulistan mein phir aag laga di hai

ai ahl-e-gharaz tum ne ta'mir to ki lekin

har dil mein ta'assub ki diwar uTha di hai

ta'bir mile shayad ab kal ke muarriKH ko

hum ne nae KHwabon ki taswir saja di hai

ehsan 'shabana' hai ye ahl-e-gulistan ka

hum jaise diwanon ko kanTon ki qaba di hai