dar pe aaen bhi tere hum to wo zanjir kahan

dar pe aa.eñ bhī tire ham to vo zanjīr kahāñ

terā insāf kahāñ adl-e-jahāñgīr kahāñ

shāh-e-ālam to kanīzoñ pe nazar rakhte haiñ

ham ko vo yaad kareñ apnī ye taqdīr kahāñ

dil ye kahtā hai ki ik din vo numāyāñ hogā

log kahte haiñ ki is daur meñ shabbīr kahāñ

apnī āñkheñ hī munāfiq hoñ to manzar kaise

ḳhvāb bik jaa.eñ to phir ḳhvāboñ kī ta.abīr kahāñ

ab to sone ke piyāloñ hī meñ ḳhairāt mile

ham faqīroñ kī ho is daur meñ tauqīr kahāñ

ham ne āyāt-e-ġham-e-ishq sunā.īñ ro kar

ḳhushk āñkhoñ se bayāñ hotī bhī tafsīr kahāñ

vaqt ke saath makānoñ ke bhī naqshe badle

ghar meñ 'jāved' purānī koī tasvīr kahāñ

dar pe aaen bhi tere hum to wo zanjir kahan

tera insaf kahan adl-e-jahangir kahan

shah-e-alam to kanizon pe nazar rakhte hain

hum ko wo yaad karen apni ye taqdir kahan

dil ye kahta hai ki ek din wo numayan hoga

log kahte hain ki is daur mein shabbir kahan

apni aankhen hi munafiq hon to manzar kaise

KHwab bik jaen to phir KHwabon ki tabir kahan

ab to sone ke piyalon hi mein KHairaat mile

hum faqiron ki ho is daur mein tauqir kahan

hum ne aayat-e-gham-e-ishq sunain ro kar

KHushk aankhon se bayan hoti bhi tafsir kahan

waqt ke sath makanon ke bhi naqshe badle

ghar mein 'jawed' purani koi taswir kahan