dar pe us shoKH ke jab ja baiTha

dar pe us shoḳh ke jab jā baiThā

yaar sab kahte haiñ achchhā baiThā

ḳhūbī-e-qismat-e-qāsid dekho

paas us shoḳh ke kyā jā baiThā

hai habāb-e-lab-e-dariyā insāñ

jab zarā sar ko uThāyā baiThā

zo.af-e-pīrī se banā naqsh-e-qadam

maiñ vahīñ kā huā jis jā baiThā

sūrat-e-bād rahā sar-gardāñ

ḳhaak kī tarah maiñ uTThā baiThā

paañv phūle jo tire kūche meñ

kaaT ke dast-e-tamannā baiThā

bahr-e-hastī meñ habāboñ kī tarah

saikḌoñ baar maiñ uTThā baiThā

kab se terā falak-e-sho.abada-bāz

dekhtā huuñ maiñ tamāshā baiThā

sāmne kis ke jhukāyā sar ko

kis liye shaiḳh tū uTThā baiThā

na to naala hai na afġhāñ ai dil

kis liye chup hai akelā baiThā

ḳhvāb-e-sair-e-chaman-e-ālam hai

kyā dil-e-zār hai phūlā baiThā

dāman-e-dil pe lagā dāġh-e-junūñ

mulk par ishq kā sikka baiThā

naqd-e-dil thā jo bizā.at meñ mirī

ishq meñ us ko bhī kho-khā baiThā

jo gayā mulk-e-adam kaun gayā

us ke kūche meñ jo baiThā baiThā

dil ko hai jazba-e-ulfat shāyad

bak rahā hai jo akelā baiThā

chal base 'muntahī' sab yaar tire

tū yahāñ kartā hai ab kyā baiThā

dar pe us shoKH ke jab ja baiTha

yar sab kahte hain achchha baiTha

KHubi-e-qismat-e-qasid dekho

pas us shoKH ke kya ja baiTha

hai habab-e-lab-e-dariya insan

jab zara sar ko uThaya baiTha

zoaf-e-piri se bana naqsh-e-qadam

main wahin ka hua jis ja baiTha

surat-e-baad raha sar-gardan

KHak ki tarah main uTTha baiTha

panw phule jo tere kuche mein

kaT ke dast-e-tamanna baiTha

bahr-e-hasti mein hababon ki tarah

saikDon bar main uTTha baiTha

kab se tera falak-e-shoabada-baz

dekhta hun main tamasha baiTha

samne kis ke jhukaya sar ko

kis liye shaiKH tu uTTha baiTha

na to nala hai na afghan ai dil

kis liye chup hai akela baiTha

KHwab-e-sair-e-chaman-e-alam hai

kya dil-e-zar hai phula baiTha

daman-e-dil pe laga dagh-e-junun

mulk par ishq ka sikka baiTha

naqd-e-dil tha jo bizaat mein meri

ishq mein us ko bhi kho-kha baiTha

jo gaya mulk-e-adam kaun gaya

us ke kuche mein jo baiTha baiTha

dil ko hai jazba-e-ulfat shayad

bak raha hai jo akela baiTha

chal base 'muntahi' sab yar tere

tu yahan karta hai ab kya baiTha