dar taKHayyul ke muqaffal nahin hone deta

dar taḳhayyul ke muqaffal nahīñ hone detā

maiñ tujhe aañkh se ojhal nahīñ hone detā

niiñd aatī hai to āñkhoñ meñ jagah detā huuñ

apnī palkoñ ko maiñ bojhal nahīñ hone detā

kis ko sairāb karegā vo chhalaktā bādal

jo marī pyaas ko jal-thal nahīñ hone detā

chhīn letā hai musavvir ke sabhī hosh-o-havās

husn tasvīr mukammal nahīñ hone detā

kis ko iflās ne rakkhā hai shagufta-ḳhātir

ye to bachchoñ ko bhī chanchal nahīñ hone detā

koī kāñdhe pe mire haath dhare hai 'mahtāb'

ye taḳhayyul mujhe pāgal nahīñ hone detā

dar taKHayyul ke muqaffal nahin hone deta

main tujhe aankh se ojhal nahin hone deta

nind aati hai to aankhon mein jagah deta hun

apni palkon ko main bojhal nahin hone deta

kis ko sairab karega wo chhalakta baadal

jo mari pyas ko jal-thal nahin hone deta

chhin leta hai musawwir ke sabhi hosh-o-hawas

husn taswir mukammal nahin hone deta

kis ko iflas ne rakkha hai shagufta-KHatir

ye to bachchon ko bhi chanchal nahin hone deta

koi kandhe pe mere hath dhare hai 'mahtab'

ye taKHayyul mujhe pagal nahin hone deta