daraaz gesu damakte aariz kaman abru azab aankhen

darāz gesū damakte aariz kamān abrū azaab āñkheñ

uḌā ke rakkheñgī aaj apnā bhī hosh āḳhir sharāb āñkheñ

ye sarv sā qad ye rū-e-tābāñ ye lab shagufta ye ḳhvāb āñkheñ

kahīñ churā leñ na chain dil kā ye nargisī lā-javāb āñkheñ

ye merī be-bāk mastiyoñ se jo ho rahī haiñ gulāb āñkheñ

to dil ke sab raaz kah rahī haiñ tumhāre dil kī kitāb āñkheñ

ye sun ke aa.e the un ke dekhe se dard-e-dil kā ilaaj hogā

sukūn dil ko to kyā hī miltā baḌhā ga.iiñ iztirāb āñkheñ

so rasm-e-kohna meñ apnī qismat sañvārne ham bhī aa ga.e haiñ

sunā thā dil muntaḳhab kareñgī vo dahr meñ intiḳhāb āñkheñ

har ik badan meñ talāshtī haiñ na jaane kis kā vajūd 'anvar'

kareñgī rusvā zarūr ik din hameñ ye ḳhāna-ḳharāb āñkheñ

daraaz gesu damakte aariz kaman abru azab aankhen

uDa ke rakkhengi aaj apna bhi hosh aaKHir sharab aankhen

ye sarw sa qad ye ru-e-taban ye lab shagufta ye KHwab aankhen

kahin chura len na chain dil ka ye nargisi la-jawab aankhen

ye meri be-bak mastiyon se jo ho rahi hain gulab aankhen

to dil ke sab raaz kah rahi hain tumhaare dil ki kitab aankhen

ye sun ke aae the un ke dekhe se dard-e-dil ka ilaj hoga

sukun dil ko to kya hi milta baDha gain iztirab aankhen

so rasm-e-kohna mein apni qismat sanwarne hum bhi aa gae hain

suna tha dil muntaKHab karengi wo dahr mein intiKHab aankhen

har ek badan mein talashti hain na jaane kis ka wajud 'anwar'

karengi ruswa zarur ek din hamein ye KHana-KHarab aankhen