dard ab had se guzar kar la-dawa hone ko hai

dard ab had se guzar kar lā-davā hone ko hai

aap kī ulfat meñ dekheñ aur kyā hone ko hai

aap ke abrū-e-pur-ḳham ke karishme al-amāñ

ik ishāre meñ na jaane kyā se kyā hone ko hai

be-hayā.ī daur-e-hāzir kī ye kahtī hai mujhe

husn parde se nikal kar bad-numā hone ko hai

taare Takrāne ko haiñ aur zalzale aane ko haiñ

az-zamīñ-tā-āsmāñ mahshar bapā hone ko hai

raat din kaTtī hai ab umr-e-azīz is fikr meñ

hashr meñ pesh-e-ḳhudā 'ḳhurshīd' kyā hone ko hai

dard ab had se guzar kar la-dawa hone ko hai

aap ki ulfat mein dekhen aur kya hone ko hai

aap ke abru-e-pur-KHam ke karishme al-aman

ek ishaare mein na jaane kya se kya hone ko hai

be-hayai daur-e-hazir ki ye kahti hai mujhe

husn parde se nikal kar bad-numa hone ko hai

tare Takrane ko hain aur zalzale aane ko hain

az-zamin-ta-asman mahshar bapa hone ko hai

raat din kaTti hai ab umr-e-aziz is fikr mein

hashr mein pesh-e-KHuda 'KHurshid' kya hone ko hai