dard-angez hai is tarah se us ka jaana

dard-angez hai is tarah se us kā jaanā

jaise ik jism se ik ruuh kā khīñchā jaanā

tum ne kuchh pūchhā na samjhā na irāda jaanā

mujh ko bas ek mulāqāt meñ kitnā jaanā

merī tanhā.ī-pasandī kahāñ le aa.ī mujhe

der tak sochnā chup rahnā phir uktā jaanā

bas vo guzre hue lamhoñ kī thakan hotī hai

log kahte haiñ jise aañkh kā pathrā jaanā

terī ḳhairāt bas itnī hai samajh paa.e agar

ik savālī kā savālī ko navāzā jaanā

TuuT jā.egā mirī zaat kā phir saarā tilism

ab agar tū ne mujhe mujh se ziyāda jaanā

fikr kī dhuup ne ye haal kiyā hai 'bismil'

jaise ik phuul kā be-vaqt hī murjhā jaanā

dard-angez hai is tarah se us ka jaana

jaise ek jism se ek ruh ka khincha jaana

tum ne kuchh puchha na samjha na irada jaana

mujh ko bas ek mulaqat mein kitna jaana

meri tanhai-pasandi kahan le aai mujhe

der tak sochna chup rahna phir ukta jaana

bas wo guzre hue lamhon ki thakan hoti hai

log kahte hain jise aankh ka pathra jaana

teri KHairaat bas itni hai samajh pae agar

ek sawali ka sawali ko nawaza jaana

TuT jaega meri zat ka phir sara tilism

ab agar tu ne mujhe mujh se ziyaada jaana

fikr ki dhup ne ye haal kiya hai 'bismil'

jaise ek phul ka be-waqt hi murjha jaana