dard-e-dil apna sunana chahiye

dard-e-dil apnā sunānā chāhiye

hañsne vāloñ ko rulānā chāhiye

kū-e-qātil meñ jo honī ho so ho

be-takalluf aanā jaanā chāhiye

teġh-e-abrū ke shahīdoñ ke liye

āḳhirī ḳhil.at shahāna chāhiye

gar qadam rakhnā hai kū-e-yār meñ

zindagī se haath uThānā chāhiye

kyā kahūñ bedardī-e-sayyād-e-ishq

us ke phande meñ na aanā chāhiye

ham jo baiTheñ to kahāñ juz kū-e-dost

koī apnā bhī Thikānā chāhiye

ranj de kar ḳhush nahīñ rahtā koī

kyoñ kisī kā dil dukhānā chāhiye

qissa-e-farhād-o-majnūñ ho jahāñ

kuchh to apnā bhī fasānā chāhiye

dekhnā hai gar bahār-e-bāġh-e-ishq

ḳhuun ke aañsū bahānā chāhiye

yaar ke dar kī hai chhānī jis ne ḳhaak

us ko sar par ḳhaak uḌānā chāhiye

jaag ke kyoñ so ga.e phir ai 'haqīr'

kyā tumheñ har dam jagānā chāhiye

dard-e-dil apna sunana chahiye

hansne walon ko rulana chahiye

ku-e-qatil mein jo honi ho so ho

be-takalluf aana jaana chahiye

tegh-e-abru ke shahidon ke liye

aaKHiri KHilat shahana chahiye

gar qadam rakhna hai ku-e-yar mein

zindagi se hath uThana chahiye

kya kahun bedardi-e-sayyaad-e-ishq

us ke phande mein na aana chahiye

hum jo baiThen to kahan juz ku-e-dost

koi apna bhi Thikana chahiye

ranj de kar KHush nahin rahta koi

kyon kisi ka dil dukhana chahiye

qissa-e-farhad-o-majnun ho jahan

kuchh to apna bhi fasana chahiye

dekhna hai gar bahaar-e-bagh-e-ishq

KHun ke aansu bahana chahiye

yar ke dar ki hai chhani jis ne KHak

us ko sar par KHak uDana chahiye

jag ke kyon so gae phir ai 'haqir'

kya tumhein har dam jagana chahiye