dard-e-dil kaif-e-alam soz-e-jigar se pahle

dard-e-dil kaif-e-alam soz-e-jigar se pahle

zindagī kuchh bhī na thī terī nazar se pahle

fikr-e-fardā ġham-e-imroz rivāyāt-e-kuhan

kitnī rāheñ haiñ tirī rāhguzar se pahle

jin ujāloñ ko zamāne kī sahar honā hai

vo guzarte haiñ mirī fikr-o-nazar se pahle

tum kahoge to zabānī bhī sunā.ūñ lekin

hāl-e-dil pūchh to lo dīda-e-tar se pahle

haa.e ye baat ujāloñ ko abhī kyā ma.alūm

raat kis tarah se guzrī hai sahar se pahle

jab bhī ta.amīr-e-nasheman kā ḳhayāl aayā hai

mashvara ham ne kiyā barq-o-sharar se pahle

zindagānī meñ masarrat kī tamannā goyā

vo duā hai jo bhaTaktī hai asar se pahle

na vo taare na vo armāñ na vo dilkash naġhme

kitne fānūs bujhe pichhle pahar se pahle

sach to ye hai ki hameñ bāġh-e-jahāñ meñ azmat

saikḌoñ ḳhaar mile ik gul-e-tar se pahle

dard-e-dil kaif-e-alam soz-e-jigar se pahle

zindagi kuchh bhi na thi teri nazar se pahle

fikr-e-farda gham-e-imroz riwayat-e-kuhan

kitni rahen hain teri rahguzar se pahle

jin ujalon ko zamane ki sahar hona hai

wo guzarte hain meri fikr-o-nazar se pahle

tum kahoge to zabani bhi sunaun lekin

haal-e-dil puchh to lo dida-e-tar se pahle

hae ye baat ujalon ko abhi kya malum

raat kis tarah se guzri hai sahar se pahle

jab bhi tamir-e-nasheman ka KHayal aaya hai

mashwara hum ne kiya barq-o-sharar se pahle

zindagani mein masarrat ki tamanna goya

wo dua hai jo bhaTakti hai asar se pahle

na wo tare na wo arman na wo dilkash naghme

kitne fanus bujhe pichhle pahar se pahle

sach to ye hai ki hamein bagh-e-jahan mein azmat

saikDon KHar mile ek gul-e-tar se pahle