dard-e-dil ki dawa na ho jae

dard-e-dil kī davā na ho jaa.e

zindagī be-mazā na ho jaa.e

lutf detī hai kyā umīd-e-vafā

bevafā bā-vafā na ho jaa.e

kaise betāb un ko dekhūñgā

aah yārab rasā na ho jaa.e

dil meñ hasrat basā to lī hai magar

ye kaḌī silsila na ho jaa.e

apnī duniyā usī se raushan hai

gul charāġh-e-vafā na ho jaa.e

ham sitam ko karam samajhte haiñ

un pe ye raaz vā na ho jaa.e

ik zamāna hai us kā dīvāna

kahīñ vo but ḳhudā na ho jaa.e

dil hī sab se baḌā sahārā hai

dil kisī se judā na ho jaa.e

tum agar chhū lo apne hoñToñ se

sher merā tirā na ho jaa.e

dil luTā kar 'jigar' hamārī tarah

koī be-āsrā na ho jaa.e

dard-e-dil ki dawa na ho jae

zindagi be-maza na ho jae

lutf deti hai kya umid-e-wafa

bewafa ba-wafa na ho jae

kaise betab un ko dekhunga

aah yarab rasa na ho jae

dil mein hasrat basa to li hai magar

ye kaDi silsila na ho jae

apni duniya usi se raushan hai

gul charagh-e-wafa na ho jae

hum sitam ko karam samajhte hain

un pe ye raaz wa na ho jae

ek zamana hai us ka diwana

kahin wo but KHuda na ho jae

dil hi sab se baDa sahaara hai

dil kisi se juda na ho jae

tum agar chhu lo apne honTon se

sher mera tera na ho jae

dil luTa kar 'jigar' hamari tarah

koi be-asra na ho jae