dard-e-furqat se qarabat si hui jati hai

dard-e-furqat se qarābat sī huī jaatī hai

haa.e ye bhī mirī aadat sī huī jaatī hai

uf dam-e-naz.a bhar aa.ī haiñ ye kis kī āñkheñ

mujh ko jiine kī zarūrat sī huī jaatī hai

rashk kī ye ḳhirad-āshobiyāñ allāh allāh

apne saaya se bhī vahshat sī huī jaatī hai

husn āmāda-e-takmīl-e-jafā hai ai dost

phir mujhe apnī zarūrat sī huī jaatī hai

jaur-e-paiham meñ zarā jiddateñ paidā kiije

lazzat-e-ġham mirī aadat sī huī jaatī hai

bā.is-e-sahv do-ālam thī kabhī bāda-kashī

aur ye ab to ibādat sī huī jaatī hai

jab se samjhā huuñ maiñ taḳhlīq kā maqsad 'bismil'

zarre zarre se mohabbat sī huī jaatī hai

dard-e-furqat se qarabat si hui jati hai

hae ye bhi meri aadat si hui jati hai

uf dam-e-naza bhar aai hain ye kis ki aankhen

mujh ko jine ki zarurat si hui jati hai

rashk ki ye KHirad-ashobiyan allah allah

apne saya se bhi wahshat si hui jati hai

husn aamada-e-takmil-e-jafa hai ai dost

phir mujhe apni zarurat si hui jati hai

jaur-e-paiham mein zara jiddaten paida kije

lazzat-e-gham meri aadat si hui jati hai

bais-e-sahw do-alam thi kabhi baada-kashi

aur ye ab to ibaadat si hui jati hai

jab se samjha hun main taKHliq ka maqsad 'bismil'

zarre zarre se mohabbat si hui jati hai