dard-e-jigar kisi ko bataya na jaega

dard-e-jigar kisī ko batāyā na jā.egā

ye daaġh chārāgar ko dikhāyā na jā.egā

ehsān kar ke aap to fāriġh hue janāb

ye bār-e-lutf ham se uThāyā na jā.egā

dil ko to rok leñge nigāhoñ kā kyā kareñ

ham se to rāz-e-'ishq chhupāyā na jā.egā

rakh paañv rāh-e-shauq pe sau baar soch kar

is rahguzar se lauT ke aaya na jā.egā

toḌā jinhoñ ne dil mirā apne hī log the

ye hādisa kisī ko batāyā na jā.egā

yādoñ ko apnī dil meñ mire rahne dījiye

ghar ye ujaḌ gayā to basāyā na jā.egā

nukta-rasoñ kī bhiiḌ hai Dartā huuñ ai 'sadā'

mahfil meñ aisī she'r sunāyā na jā.egā

dard-e-jigar kisi ko bataya na jaega

ye dagh chaaragar ko dikhaya na jaega

ehsan kar ke aap to farigh hue janab

ye bar-e-lutf hum se uThaya na jaega

dil ko to rok lenge nigahon ka kya karen

hum se to raaz-e-'ishq chhupaya na jaega

rakh panw rah-e-shauq pe sau bar soch kar

is rahguzar se lauT ke aaya na jaega

toDa jinhon ne dil mera apne hi log the

ye hadisa kisi ko bataya na jaega

yaadon ko apni dil mein mere rahne dijiye

ghar ye ujaD gaya to basaya na jaega

nukta-rason ki bhiD hai Darta hun ai 'sada'

mahfil mein aisi she'r sunaya na jaega