dard hi dard thi minnat-kash-e-darman to na thi

dard hī dard thī minnat-kash-e-darmāñ to na thī

zindagī ḳhvāb to thī ḳhvāb-e-pareshāñ to na thī

jab havā le ke chalī thī tire kūche kī taraf

mirī jānib nigarāñ gardish-e-daurāñ to na thī

zindagī shahr-e-ġhazālāñ meñ bagūloñ kī tarah

mujh se pahle mirī āvāz pe raqsāñ to na thī

har-nafas saath rahī hai mire saa.e kī tarah

aap kī yaad mirī umr-e-gurezāñ to na thī

dil dhaḌaktā hai to hālāt badal jaate haiñ

raat tak koī kalī chāk-garebāñ to na thī

tū ne duzdīda-nigāhoñ se jise dekhā thā

terī tasvīr thī tasvīr-e-gulistāñ to na thī

ḳhvāb sharminda-e-ta.abīr ka.ī the 'nashtar'

zindagī arsa-gah-e-ḳhvāb-e-ġhazālāñ to na thī

dard hi dard thi minnat-kash-e-darman to na thi

zindagi KHwab to thi KHwab-e-pareshan to na thi

jab hawa le ke chali thi tere kuche ki taraf

meri jaanib nigaran gardish-e-dauran to na thi

zindagi shahr-e-ghazalan mein bagulon ki tarah

mujh se pahle meri aawaz pe raqsan to na thi

har-nafas sath rahi hai mere sae ki tarah

aap ki yaad meri umr-e-gurezan to na thi

dil dhaDakta hai to haalat badal jate hain

raat tak koi kali chaak-gareban to na thi

tu ne duzdida-nigahon se jise dekha tha

teri taswir thi taswir-e-gulistan to na thi

KHwab sharminda-e-tabir kai the 'nashtar'

zindagi arsa-gah-e-KHwab-e-ghazalan to na thi