dard hi se faqat bani ho kya

dard hī se faqat banī ho kyā

zindagī itnī hī burī ho kyā

tum se itnā lagāv kyoñ hai mujhe

tum mirī ruuh meñ basī ho kyā

hāl-e-dil to chhupā chukā thā maiñ

tum mirī āñkheñ paḌh rahī ho kyā

gaañv kab kā ujaḌ gayā bhaa.ī

shahr se lauTe hī abhī ho kyā

chubh rahī haiñ ye dhaḌkaneñ bhī ab

dil ke TukḌe hī kar ga.ī ho kyā

dūsre kitne mil ga.e hoñge

ab use merī hī kamī ho kyā

ho ga.ī hai to maan le ġhalatī

terī har baat ab sahī ho kyā

ashk kāġhaz bhigo rahe haiñ kyoñ

'zaif' kī nazm paḌh rahī ho kyā

dard hi se faqat bani ho kya

zindagi itni hi buri ho kya

tum se itna lagaw kyon hai mujhe

tum meri ruh mein basi ho kya

haal-e-dil to chhupa chuka tha main

tum meri aankhen paDh rahi ho kya

ganw kab ka ujaD gaya bhai

shahr se lauTe hi abhi ho kya

chubh rahi hain ye dhaDkanen bhi ab

dil ke TukDe hi kar gai ho kya

dusre kitne mil gae honge

ab use meri hi kami ho kya

ho gai hai to man le ghalati

teri har baat ab sahi ho kya

ashk kaghaz bhigo rahe hain kyon

'zaif' ki nazm paDh rahi ho kya